Ժամանակակից մարդու կյանքի անբաժանելի մասն է առնչությունը բանկային համակարգին․ քարտային հաշվիներից մինչև դրամական փոխանցումներ, ավանդներից մինչև վարկեր․․․ վերջինների մասին էլ կխոսենք այսօր։
Ինչպես գրագետ վարկ վերցնել և նույնքան գրագետ մարել այն.
1․ Նախքան վարկային պայմանագիր կնքելը հարկավոր է ուշադրություն դարձնել 2 կարևոր բաղադրիչի՝ մարման ժամանակացույց և տոկոսադրույք։ Առաջինին դեռ կհասցնենք անդրադառնալ․․․ ինչ վերաբերում է երկրորդին․ այստեղ պետք է լինել առավելագույնս ուշադիր։ Պետք է վարկի «տարեկան անվանական տոկոսադրույքը» տարբերել «տարեկան փաստացի տոկոսադրույքից»։ Առաջինը վարկատուի սահմանած ֆիքսված տոկոսադրույքի չափն է, որի հիման վրա հաշվարկվելու է տոկոսավճարների մեծությունը, երկրորդը կարող է ներառել նաև վարկ տրամադրելու և վարկը սպասարկելու միջնորդավճարները, գրավադրվող գույքի գնահատման ծախսերը, ապահովագրական ծախսերը և այլն:
Կարևոր է մեծ ուշադրություն դարձնել տարեկան փաստացի տոկոսադրույքին․ այդպիսով ճշգրիտ կիմանաս՝ «որքան կնստի այդ վարկը քեզ վրա»։
2․ Նախքան վարկային պայմանագիր կնքելը հնարավորություն է տրվում ընտրել վարկի ամենամսյա, հերթական մարման օրը: Հենց այդ որոշման հիման վրա էլ ամրագրվում է քո վարկի մարման ժամանակացույցը։ Այստեղ խորհուրդը մեկն է․ որպես վարկի հերթական մարման օր ընտրիր աշխատավարձիդ ստացմանը հաջորդող օրերից մեկը: Այդպիսով՝ կարող ես վստահ լինել, որ ամեն ամիս այդ օրը վճարումն իրականացնելու բավարար գումար կունենաս։
3․ Վարկերը տրամադրվում են տարբեր արժույթներով, ուստի՝ դու ևս մեկ որոշում պետք է կայացնես․ ի՞նչ արժույթով ձևակերպել վարկդ։ Այստեղ խորհուրդը շատ պարզ է․ եթե եկամուտներդ ստանում ես դրամով, ապա ավելի ապահով է վարկը ձևակերպել հենց այդ արժույթով։ Դա քեզ զերծ կպահի փոխարժեքի տատանման հետևանքով ֆինանսական վնասներ կրելու ռիսկից։ Հանուն արդարության պիտի նշենք, որ սովորաբար՝ արտարժույթով վարկերն ունենում են համեմատաբար ցածր տարեկան անվանական տոկոսադրույք, և փոխարժեքի տատանման արդյունքում դու կարող ես նաև շահել․ բայց արդյո՞ք արժե դիմել այդ ռիսկին․․․
4․ Որպեսզի ունենաս վարկային լավ պատմություն և հետագայում օգտվես «հուսալի վարկառուներին» տրամադրվող արտոնություններից, կարևոր է, որ ընթացիկ վարկի վճարումները կատարես ճիշտ ժամանակին։
Եթե ինչ-որ անհիշելի իրականության մեջ վարկի հերթական վճարման համար մենք անվերջանալի թվացող հերթի մեջ էինք, մեկ-մեկ մեր տեղը զիջում էինք մի տատիկի, որ արյան ճնշման խնդիր ուներ, երբեմն էլ իսկական կռվի մեջ էինք մտնում ընդամենը «մի բան հարցնելու» համար եկածի հետ, հիմա իրականությունն այլ է․ սպասելու անհրաժեշտություն չկա, հետևաբար՝ վարկի հերթական վճարումն ուշացնելու արդարացումները չեն ընդունվում․
Չէ՞ որ Telcell Wallet-ի միջոցով կարող ես ցանկացած վայրում ու ժամի կատարել վարկային վճարումներդ՝ խնայելով ժամանակդ ու նյարդերդ։
5․ Գոյություն ունեն այնպիսի վարկատեսակներ, որոնց վաղաժամկետ մարման դեպքում գործում են տույժեր և տուգանքներ։ Հիմնականում դրանք երկարաժամկետ վարկերն են։ Նախքան վարկային պայմանագիր կնքելը համոզվիր՝ արդյո՞ք առկա են նման տույժ-տուգանքներ, ու եթե այո՝ որքան է դրանց չափը։ Այդպիսով հետագայում անակնկալի չես գա՝ հայտաբերելով, որ վարկի վաղաժամկետ մարումն այդքան էլ գովելի չէ։
Մի վախեցիր վարկերից, առավել ևս, եթե տիրապետում ես դրանք գրագետ սպասարկելու տեղեկատվությանը, նաև հոգ տար, որ գումարը ծառայի իր նպատակին․․․
