Լավ մոտիվացիան գործի կեսն է։ Առաջարկում եմ 5 գիրք, որոնք մի լավ կօգնեն մոտիվացիայի հարցում, մի բան էլ՝ պետքական բիզնես-խորհուրդներ կտան:
Այսպիսով…
- Ռոբերտ Կիյոսակի, «Հարուստ հայրիկ, Աղքատ հայրիկ»
Ճապոնական ծագմամբ ամերիկացի գործարար, ներդրող, գրող և ուսուցիչ Ռոբերտ Կիյոսակիի այս գիրքը սովորեցնում է վերահսկել ու կառավարել ֆինանսական միջոցները և ոչ միայն: Գիրքն ինքնակենսագրական է. գրքի հերոսը ծնվել է քաղաքացիական ծառայողի՝ բանիմաց մի ուսուցչի ընտանիքում, որը թեև վատ չէր վաստակում, սակայն գումարը միշտ չէր բավարարում։ Այս հերոսը, ում նախատիպն է Կիյոսակիի հայրը, հակադրության մեջ է դրվում մեկ այլ հերոսի հետ, ում հեղինակն անվանում է «Հարուստ հայրիկ». վերջինս նրա ընկեր Մայքլի հայրն էր՝ անկիթ բիզնեսմեն, որը դարձել էր Հավայան կղզիների ամենահարուստ մարդկանցից մեկը։ Տարբեր հայրիկներ՝ տարբեր արժեքներ… և հեղինակ, ով լսել է դրանք բոլորն ու ներկայացնում է իրենը՝ պատգամելով․ եթե ունեք մեծ գումար, այն մի ծախսեք Ձեր հաճույքի համար, ներդրեք բիզնեսում, ստեղծեք մշտական եկամուտ:
- Ռոբերտ Չալդինի, «Ազդեցության հոգեբանությունը»
Գիրք, որը բոլոր իրավունքներն ունի համարվել գիտական լուրջ ուսումնասիրություն։ Վերլուծում է մարդկանց մոտիվացնելու ու որոշումներ կայացնելու մեխանիզմը: Այն մենեջմենթի, ազդեցության ու կոնֆլիկտների մասին լավագույն ձեռնարկներից է։ Ավելի քան 1․5 միլիոն օրինակով տպագրված գիրքն օգտագործում են ողջ աշխարհի հոգեբանները … և ոչ միայն: Ո՞վ, եթե ոչ լավ բիզնեսմենն ունի մոտիվացնելու, կոնֆլիկտները կանխելու կամ հարթելու, մարդկանց վրա ի շահ գործի ներազդելու հմտությունների կարիք: Գիրքն ունի պարզ բառամթերք, հետաքրքիր գրելաոճ ու ամենակարևորը՝ պրակտիկ, աշխատող մեթոդներ:
- Սպենսեր Ջոնսոն, «Ու՞ր է իմ պանիրը»
Ջոնսոնի այս գործն ամենընթերցված գրքերից է. պատմություն՝ փոփոխության մասին։ Գործողությունները ծավալվում են լաբիրինթոսում, որտեղ չորս հերոսներ առերեսվում են փոփոխության հետ, և յուրաքանչյուրը ցուցաբերում է յուրօրինակ վարքագիծ. դրանով հեղինակը ներկայացնում է մեր իսկ վարքագիծը: Գրքի հեղինակը՝ դոկտոր Սպենսեր Ջոնսոնը, գրել է առաջին հայացքից պարզ մի պատմություն, որը, սակայն, ունի շատ կարևոր ենթատեքստ ու կարող է հիմնովին փոխել մեր մոտեցումը՝ հենց փոփոխության նկատմամբ: Մեզնից շատերը վախենում են փոփոխություններից, քանի որ վախենում են չկարողանալ վերահսկել դրանց ընթացքը: Հեղինակը համոզում է՝ կարևորը մեր վերաբերմունքն է փոփոխության նկատմամբ: Գիրքը ուղեղի հիանալի մարզանք է ապագի բիզնեսմենների կամ պարզապես հաջողակների համար:
- Ջորջ Սամուել Քլեյսոն, «Բաբելոնի ամենահարուստ մարդը»
Այս գիրքն ուսումնասիրում է հենց անձնական հաջողության հիմունքներն ու գաղտնիքները, նաև հստակ լուծումներ է տալիս՝ ինչպես վերջնականապես հրաժեշտ տալ դատարկ դրամապանակին, ինչպիսին են ֆինանսական աշխարհի կանոնները և, ի վերջո, ինչպես դառնալ «Բաբելոնի ամենահարուստ մարդը»: Գիրքն իրապես ֆինանսական հանրագիտարան է, որն ընթերցողին տեղափոխում է հին Բաբելոն, որտեղ ձևավորվել են ֆինանսական առաջին օրենքները, որոնք, չզարմանաք, արդիական են առայսօր: Գիրքը բացահայտում է փողի բոլոր գաղտնիքները՝ ինչպես կապիտալ կուտակել, պահպանել այն ու եկամտին ստիպել աշխատել քո օգտին:
- Օգ Մանտինո, «Աշխարհի մեծագույն վաճառականը»
Գիրք, որն ասում է՝ կարևոր չէ, թե ով ես դու այսօր, ես քեզ կսովորեցնեմ փոխել կյանքդ: Գրքի գերագույն պնդումը մեկն է. եթե չես կարողանում վաճառել քո մտքերը, ծառայությունները կամ ապրանքը, ապա երբեք հաջողության չես հասնի բիզնեսում: Իհարկե՝ այս թեման բազմիցս կիրառվել է մոտիվացնող գրականության մեջ, սակայն Օգ Մանտինոյին հաջողվել է դրանց բոլորի կարևորագույն ու գործող դրույթներն ամփոփել մեկ գրքում: Այս գիրքը նաև հարգանքի տուրք է հանճարեղ վաճառականին՝ Վ. Քլեմենտ Սթոունին, ով սերը, կարեկցանքը և վաճառելու արվեստի յուրօրինակ գաղափարախոսությունը միաձուլեց՝ ստեղծելով հաջողության դինամիկ փիլիսոփայություն, որը տարեցտարի ուղղորդում է հազարավոր մարդկանց՝ բացահայտելու էլ ավելի մեծ ներուժ, կամք ու վերջնարդյունքում՝ երջանկություն:
