Հարյուրավոր մարդիկ մեր երկրում և միլիոնավորները ամբողջ աշխարհում ամեն օր տարատեսակ զեղծարարությունների թիրախ են դառնում։ Եկեք անդրադառնանք դրանցից մեկին՝ կիբեռհանցագործություններին, որոնք վտանգում են անձնական տվյալների և բանկային հաշիվների անձեռնմխելիությունը։
Զեղծարարները տեքստային հաղորդագրությունների, հեռախոսազանգերի, էլ.փոստի կամ սոցիալական ցանցերի միջոցով կարող են կապ հաստատել ու ներկայանալ օրինակ՝ Ձեր հաշիվները սպասարկող բանկի, Telcell-ի, ոստիկանության կամ հարկային մարմինների աշխատակից ու խնդրել, որ Ձեր միջոցները փոխանցեք «անվտանգ հաշվի»՝ պատճառաբանելով, թե Ձեր գործող հաշիվը վտանգված է։ Հնարավոր է խաբեությամբ փորձեն Ձեզ հարկադրել գաղտնաբառեր, անձնական տվյալներ տրամադրել, կարող են սպառնալ իրավական բացասական հետևանքներով։
10 ԿԱՐԵՎՈՐ ԽՈՐՀՈՒՐԴ
🔺Հիշե՛ք, որ Ձեր հաշիվները սպասարկող բանկը, Telcell-ը, հարկային մարմինները կամ ոստիկանությունը երբեք չեն խնդրի գումար փոխանցել այլ հաշվի:
🔺 Երբ ինչ-որ մեկը, ներկայանալով որևէ հաստատության անունից, խնդրում է որևէ ծրագիր ներբեռնել, երբե՛ք մի ներբեռնեք։ Զեղծարարներն այդ տարբերակով փորձում են մուտք գործել Ձեր անձնական համակարգիչ կամ հեռախոս՝ Ձեր անձնական տվյալներին հասանելիություն ունենալու նպատակով։
🔺Երբեք որևէ մեկին մի՛ տրամադրեք Ձեր PIN կոդը կամ գաղտնաբառը, հատկապես նրանց, ովքեր Ձեզ հետ կապ են հաստատում առանց Ձեր հարցման։ Հիշեք՝ PIN կոդը կամ գաղտնաբառը գաղտնի տվյալներ են։
🔺 Երբեք որևէ մեկին թույլ մի՛ տվեք մուտք գործել Ձեր անձնական համակարգիչ, հեռախոս կամ այլ սարքեր:
🔺 Եթե ինչ-որ մեկը սպառնում է տուգանել կամ իրավական պատասխանատվության ենթարկել Ձեզ, որևէ գործողությունից առաջ ուսումնասիրեք տեղեկատվությունը, դիմեք իրավաբանական խորհրդատվության։
🔺Զեղծարարները կարող են նմանակել հեռախոսահամարները, որպեսզի ճշմարտանման թվան: Միայն այն պատճառով, որ հեռախոսահամարը հիշեցնում է այս կամ այն կազմակերպության համարը, չի նշանակում, թե պետք է վստահել զանգահարողին:
🔺Եթե զանգ/նամակ եք ստացել առանց հայտ ներկայացնելու, միանգամից անձնական կամ ֆինանսական տվյալներ մի՛ տրամադրեք: Երբեք մի՛ սեղմեք հետադարձ զանգի կոճակը։ Անմիջապես կապ հաստատեք տվյալ կազմակերպության հետ՝ օգտագործելով էլ.փոստի պաշտոնական հասցեն կամ հեռախոսահամարը:
🔺Հարկային մարմինը կամ սոցիալական ծառայություն մատուցող ընկերությունը Ձեր անձնական, ֆինանսական տվյալները երբեք չի պահանջի էլեկտրոնային փոստի, տեքստային հաղորդագրության կամ հեռախոսազանգի միջոցով:
🔺Զեղծարարները կարող են որոշակի տեղեկություններ ունենալ Ձեր մասին և փորձել կոմպետենտ թվալ: Ձեր անունն իմանալը կամ անձնական որոշ տվյալների տիրապետելը դեռևս չի նշանակում, թե տվյալ անձը իրավասու է այլ տեղեկություններ ևս ստանալ: Հարցերին մի՛ պատասխանեք, քանի դեռ համոզված չեք, որ Ձեզ զանգահարողն իրավասու է իմանալ ավելին։
🔺Եթե անսպասելի զանգ եք ստացել Telcell-ից, հիշե՛ք, որ դա կարող է խաբեություն լինել։ Ընդհատեք զանգը և անմիջապես կապ հաստատեք մեզ հետ՝ Telcell Wallet հավելվածում առկա կապի միջոցների, մեր պաշտոնական կայքի կամ 060272225 հեռախոսահամարի միջոցով:
✅ Հետևե՛ք անվտանգության կանոններին և եղե՛ք պաշտպանված։
